《想轉職，不是只有離職一個選項》讀後感：創造改變，由自己開始

最近喺書店見到一本書，書名寫住「轉職選項」，點知揭開先發現，原來作者想講嘅係——「想轉變，並不是只有離職一個選項」。 呢句說話,其實幾值得我哋停低諗一諗。好多時候,一遇到工作唔開心，第一個反應就係「不如辭職算啦」。但辭咗職之後，下一份工作,又是否一定會更好?轉變嘅方法，原來遠比我哋想像中多。 作者並冇叫人「工作有問題,就一律辭職」,反而好誠實咁指出——世界上好難搵到一份完美嘅Dream Job,轉工亦不代表一定會勝過現在。與其匆忙離開,不如先諗清楚自己想要嘅改變,究竟係咩。書入邊提出咗幾個相當實際、值得參考嘅方法: 1️⃣ 主動創造機會 即使暫時只能夠留低,都不代表咩都做唔到。可以試吓喺現有崗位度,做出一件屬於自己嘅「代表作」,同時裝備自己——例如學習與未來方向相關嘅語言、知識或技能。每一步累積,都係為將來鋪路。等機會真正嚟到嗰陣,你已經悄悄進化咗一步,亦會準備得更加充分。 2️⃣ 以終為始,釐清2-3個工作重視嘅條件 先列出理想工作嘅要素,再排列先後次序;又或者反過來運用剔除法,剔走自己最唔想要嘅嘢。跟住睇吓現時市面上嘅工作機會,有冇滿足到自己最重視嘅2-3個條件,再思考有咩方法,可以一步步行近呢啲目標。呢個過程,其實亦係一次重新認識自己嘅機會。 3️⃣ 開啟「第二隻腳」 如果暫時未搵到自己嘅興趣同優勢喺邊,不妨試吓為自己訂立放工後嘅學習目標(建議一年唔好超過3項),結合自身能力去做啲實際嘅嘢出嚟,再勇敢咁交畀市場同身邊人驗證。呢一隻「第二隻腳」,隨時可以成為將來轉變嘅重要支點。 書入邊有一句說話,睇完印象特別深刻:「人生沒有目標路更廣,不論你往哪走,都是向前走!」原來,迷惘好多時並唔係因為冇路可行,而係我哋仲未搞清楚,自己真正想要嘅究竟係咩。想通咗呢一點,其實會發現,每一步都算數,每一個嘗試,都係向前。 睇完呢本書,不禁反思返自己每一次面對轉變前嘅猶豫——其實從來都唔係「應唔應該行」嘅問題,而係有冇認真諗清楚,自己想去嘅方向。與其焦慮,不如將呢份不安,轉化為主動探索嘅動力。 如果你都喺人生某個階段,感覺有啲卡住,不妨嚟『人生實驗所』睇吓——我哋幫你搜羅同配對世界各地嘅有趣體驗,等每一次探索同嘗試,都成為點亮未來嘅一丁點火花。