大家好，我係「人生實驗所」嘅創辦人阿A 。 我大學時修讀人力資源管理（HRM），畢業後喺大學嘅國際交流部、義工機構NGO同埋大專院校學生事務部門工作過好一段時間。雖然我嘅工作一直都圍繞住「幫人規劃職涯、搜羅生命機會」，但坦白講，喺自己嘅人生路上，我都經常會感到迷茫。我不時會問自己：而家呢個方向真係啱我咩？我是咪行緊對嘅路？
呢種迷茫，令我想起以前讀書嘅日子。細個讀書嘅時候，成個學校部門、每位老師都會幫你留意唔同嘅機會，總有人會主動推介項目，問你：「你有冇試過呢個實習？」或者「想唔想去交流試下？」 但係出到社會之後，呢條問題，就無人再問了 。
世界開始假設你已經定咗型，假設你已經知道自己係邊個、想做咩、應該點走 。坊間大部分針對年輕人嘅探索項目、交流工作坊，對象幾乎都只限於 24 歲以下。當我哋步入職場幾年，開始感到迷失、想小步嘗試一啲新可能性嘅時候，卻發現代價高得驚人：裸辭嘅經濟成本太大；Working Holiday 對年齡同時間有嚴格限制，而且一走就要半年一年；而大部分短期體驗活動，我哋都已經「超齡」了。
買嘢有退款期，用 App 有免費試用。
點解我哋嘅人生同工作，
卻唔可以有「試試先」嘅機會？
就係咁「人生實驗所」正式成立 。呢個平台做嗰個喺你出到社會之後，依然會問你「你有冇試過⋯⋯？」嘅地方，係一個大人版本既Exchange / Student Development 部門。我哋唔承諾會改變你嘅人生，更唔會販賣夢想話「只要參加咗，你嘅人生將會從此不同」 。因為我知道，人生唔係咁運作 。我哋只希望幫你搜羅同配對世界各地值得試一試嘅可能性同實驗。
無論係職涯見學、義工遊歷、山海連結定共居共學，你唔需要喺踏出一步之前知道自己方向 / 為乜而去， 反而，希望你可以當呢個偽畀自己一個小步嘗試嘅機會，等你可以用最低嘅心理門檻，當係畀自己一段短暫嘅「人生試用期」去摸索 。
