《職涯人生 2.0 設計工作坊》後記：搵返令你雙眼發光嘅火花✨

今日去咗一個好有意思嘅 workshop，係心徹治聊室嘅「《尋回初心》——職涯人生 2.0 設計工作坊 」🧪 留意咗筠妮嘅文字同 podcast 一段時間，加上《做自己生命的設計師》都係我一本想睇咗好耐嘅書！難得有實體活動可以同其他人一齊討論，所以好快就報咗名！ 成個 workshop 嘅核心，係邀請你做返「自己生命嘅設計師」。唔係叫你即刻揀定一個答案 all in，而係用嘗試嘅心態，一步一步試出嚟。 今日嘅 workshop 建議咗三個方向： ▸ Task Crafting — 靜落嚟，連結返自己內心把聲，問返自己「我真正鍾意嘅事」到底係啲乜 ▸ Relationship Crafting — 主動去連結你心目中想成為嘅人，鼓起勇氣請教佢哋嘅建議 / 諗法 ▸ Cognitive Framing — 換一個角度，重新理解同定義自己嘅想像同未來 而今日最觸動到我嘅一刻，就係我哋各自喺紙上寫低自己「真正享受嘅事」，然後互相建議點樣將呢啲鍾意嘅事連結起嚟！你會發現，當大家講起真心鍾意嘅事情嘅時候，眼神係會閃閃發光！ 筠妮嘅分享亦都好令人印象深刻，佢分享咗自己點樣喺迷惘同低潮之中，一步一步、跌跌撞撞咁搵返自己。 佢提起一套我都好鍾意嘅電影《靈魂奇遇記》入面嗰句：「火花是活著的熱情，不是活著的目的。人生充滿可能性，只要找到方向。」 人生中，好多時其實我哋真正要搵嘅，可能只係嗰一丁點——令你雙眼發光、令你想繼續活落去嘅火花。 仲有位參加者都講咗句我好鍾意嘅嘢：「人生有時好似打緊機，難關 / 失敗嘅經歷有時反而會令你升呢；喺 Trial and error 嘅過程中，每一次重嚟，你都會多了解自己一點。」 如果你都覺得自己卡咗喺度，又或者已經好耐冇問過自己「最初想點」，其實唔使等到所有嘢都諗通先行動。 搵個咁樣嘅空間，同一班同路人坐低，誠實咁問返自己一次，已經係一個開始。 『人生實驗所』幫你搜羅同配對世界各地嘅有趣體驗，讓每一次嘅探索同嘗試，都成為點亮未來嘅一丁點火花！