有一種東西，是我們 踏出校園之後， 慢慢消失了的。

你有冇試過，係一個好普通嘅週三下午，坐喺辦公室度，突然有種奇怪嘅感覺？ 唔係憤怒，唔係傷心，就係——唔知自己點解係度。 望住螢幕，手仲係噉打字，但腦入面有把聲好輕咁問：「我而家做緊嘅嘢，係我想做嘅嘢咩？」 然後你深呼一口氣，繼續打。 · · · 我而家講嘅，唔係嗰種「我好唔開心想辭職」嘅激烈感覺。係更細、更模糊、更難開口講嘅嘢。 係坐係地鐵裏面，望住玻璃上自己嘅倒影，諗唔起上一次自己係因為「好奇」而去做一件事，係幾時。 係朋友問你「你最近有咩新嘢玩？」你笑咗笑，答唔出嚟。 係年尾回顧嗰陣，發現今年同去年好似冇咩分別——唔係因為壞事發生，係因為好似咩都冇發生過。 我係咪已經定型咗？ 去到某個年紀，生活就係咁咋？ 定係得我一個咁諗？ · · · 我諗，呢種感覺有個名，叫做——「可能性唔見咗」。 細個讀書嗰陣，成個世界都係幫你搜羅可能性嘅機器。老師問你有冇試過某個興趣班，學校幫你搵實習機會，有人主動拍你膊頭：「你好似好適合去交流喎，你有冇諗過？」 你唔需要主動去問。係有人幫你問。 出咗社會之後，就冇人再問你喇。 個世界開始假設你已經定好咗方向。 坊間大部分嘅探索項目、交流工作坊、青年計劃——幾乎都係寫住「24歲以下」。好似過咗某個年齡，你就唔使再探索，唔使再「試試」，唔使再問：「如果係另一種生活，會係點？」 但你知道，呢個假設係錯嘅。 因為嗰個問題仲喺度。只係唔知可以問邊個。 · · · 最難受嘅唔係冇答案。係慢慢唔敢再問。 因為問咗又點？Working Holiday 有年齡限制，仲要一走就半年。裸辭？租金點算。短期體驗、義工活動——大部分都已經「超齡」，或者請假成本太高，根本唔現實。 於是，個問題就擱喺心底，壓低把聲，一年又一年，靜靜等。 要等到幾時先算？ 等存夠咗錢？等鼓起咗勇氣？ 等到退休？ · · · 有件事，我一直都喺諗。 買嘢有退款期。用 App 有免費試用。 點解探索人生，係一件咁「奢侈」嘅事？ 點解一定要等到準備好，先可以試？ 我唔係叫你辭職，唔係叫你改變人生。我只係覺得——你值得有個空間，可以小步嘗試，可以帶住問題出發，踏出第一步之前，唔需要知道答案。 去試。唔鍾意，至少有個故事。最差情況，唔過係返到原點——但你已經唔係同一個人喇。 呢個，就係人生實驗所想做嘅事。 搜羅世界各地嘅可能性，等你用最低嘅心理門檻，將呢段時間當係一段短暫嘅「人生試用期」，去摸索，去感受。 因為可能性，從來冇消失過。 只係從來冇人幫你搜羅過咋。